“Nóno Gigio, cónteme ‘na storia... Cónteme de’i Baraboi de’a Prucisión del Venere Santo”

“Nóno Gigio, cónteme ‘na storia… Cónteme de’i Baraboi de’a Prucisión del Venere Santo”.

Àra caro mio, te go xa contà a storia de’a Qarésema, e deso te conto a storia de’a Setimana Santa.

Co’ se jera putèi, a Setimana Santa jera sempre ‘na festa ma anca co un fià de paura… paura de’i Baraboi !!

Se scominsiava dal Luni Santo e se spetava el Xiòba, che a sera jera sempre ‘na Messa granda par a Lavanda de’i pie. El Munsignor ciamava dodexe pescadori, che i doveva ‘ndar in sima a l’altàr, sentai su’i scagnéti de legno. A mexa messa, i se inrodoàva suxo e braghe, i se cavava scarpe e calseti e el Munsignor pasava uno par uno, inxenocià co’ ‘na broca e ‘l caìn el ghe bagnava el pie, e po’ co’ un panno de lin bianco el ghi’o sugava. 

Tuti vardàvino sta lavanda, curiosi de veder el Munsignor inxenocià, e i omeni dixeva sempre “Chissà che spussa che sà chi’i pie…”.

Dopo ‘l Xiòba, rivava el Venere Santo.

E jera veramente ‘na jornada de agitasiòn… parché a Mexojorno e statue del Signore e dei Santi in Domo e vigneva coverte da drappi viola, vigneva ligàe é campane del campanil, e scominsiava a passar par a Caelonga e el Rioterà i xagheti co’e ribebe, i coverci e i campanassi. Messa Seccaaaa, Tre bòtiiiii, Mexojornooooo, Campanèaaaaa… E cusì te savevi che ora che jera e che funsion che ‘ndava suxo in ciesa. A’e Tre scominsiava ‘l Passio. Jera na roba che no figniva mai… e infati a uno che no xe svelto, noaltri ghe dixemo “Ti sì longo come ‘l Passio”: xe ancora ‘desso a letura de’l Vangeo co’a Passion e Morte de nostro Signor Gesù Cristo. Prima che scominsia a letùra, i tre preti i se distira sul’altar e i sta distirai in penitensa.

Ma el più bèo jera a sera, co’ scominsiava a Prucisiòn. Ghe jera par primi i stendardi de’a Confraternita del Crocefisso, dopo vigneva a Confraternita co’l Gofoeòn, che ‘l pexa cussì tanto che i deve darse ‘l turno a portarlo.

Dopo vigneva a Banda, che sonava musiche sacre da morto. Desso al so posto i gà messo a Coràe.

A’a fine ghe jera el Munsignor soto el baldachin co’i turiferari e drìo tutta e xente de Caorle.

Ma ‘l beo jera in mexo: e – come anca desso – jera i sinque Baraboi. Tuti neri incapuciài, tuti discalsi, do davanti e do dadrìo coi candeòti, e quel in mexo co’l Signor in Croxe.

Noàltri putèi ‘ndavino visìn pa’ vardarli, e scampavino in parte, parché se uno te vardava sui òci, a note no te ciapavi sòno pa’a paura. 

Ghe ‘ndavino drio par tuta a strada, sempre co’l timor de eser vardai sui òci… Ma quando che jerimo davanti al Petronia, alora se fermavino a vardar e piegoréte e i agnèi che jera ligài e infiochetai dentro un recinto de’a maceeria, e i pianxeva, puaréti… parché i capiva che dopo do jorni i finiva rostìi in técia.

El Venere Santo jera astinensa, e se magnava soeo pesse, ma poco, renga e un fià de broéto co do croste de poenta de’a caldiera. 

Mi gavevo sempre fame…

Ma ea sera del Sabo Santo se stava suxo fin a Mexanòte, pa’spetàr che vignesse Pasqua. Alora sì che se podeva magnar ben… se trovava dólsi e a co’omba, e a pranso ghe jera el ben de dio, compreso i cavarèti del Venere Santo. Se ‘ndava intel recinto del puner a sercar i vòvi de’e gaìne, che a matina de Pasqua no i jera maron e crùi  ma i jera tuti coorài, rossi, blu, verdi e duri… chissà come che i faxeva a vigner fora dal cul de’e gaìne xa coorài, e anca xa duri…. Co ‘chi vovi duri, i omini xogava a tirarghe co’i schei, e chi che lo ciapava, si’o magnava tuto lu. Jera proprio ‘na bea jornada de festa.

Dopo Pasqua, vigneva Samarco, el 25 de aprìl, che par tradission se ‘ndava a far a fortaja in boschéto su’e mòte.

Se partiva a matina co’ tuta a fameja, done, omini e putei, se caricava un caretìn de roba da magnar e a farsóra pa’ cuxinar a fortaja co’i vovi, do tre fete de saeame, erbe e scioipéti che se trovava sui arxeri. Se trovava un bel posto, se distirava ‘na coverta par tera e se se meteva sóra a magnar e dopo se xogava, e anca se ‘ndava in mar a far el primo bagno de a stajon.